Një emër për t’u mbajtur mend: Shola Shoretire, 14 vjeç. Më saktë, 14 vjeç, 10 muaj e 10 ditë. Thuajse fëmijë, por tashmë është pjesë e historisë së Manchester United. Djaloshi i “Red Devils” zbriti në fushë dje në Youth League, në fitoren 2-1 kundër Valencias, në një sfidë që vë përballë të rinjtë, por bëhet fjalë për 16-18 vjeçarë, ndërsa Shola ishte si një bebe krahasuar me futbollistët e tjerë në fushë.
Dy rekorde në një ditë: Shoretire u bë lojtari më i ri në historinë e United që mori pjesë në një ndeshje zyrtare dhe më i riu që ka luajtur ndonjëherë në Youth League.
Anësor ofensiv, i lindur në 2004 dhe me origjinë nga Nigeria, Shoretire debutoi në minutën e 74-t, kur trajneri Nicky Butt vendosi t’i jepte besim.
Për momentin Shoretire është ndalur te rekordi i vendosur, por tek United nuk mendojnë për rekorde, sepse aktivizimi i Shoretire ka lidhje me një strategji të re: vlerësimi i talenteve vendas dhe besimi ndaj tyre, me shpresën se do të zbulohet ndonjë Jadon Sancho i ri, para se fëmijët të largohen dhe të bëhen burra gjetkë, me United që duhet të shpenzojë miliona për t’i kthyer në shtëpi.