Ish-trajneri Astrit Hafizi argumenton se ndeshja mes Partizanit dhe Kukësit nuk u ngjit në nivelin që pritej edhe për faktin se skuadrat u treguan shumë të kujdesshme për të mos humbur këtë sfidë.
“Te Partizani mungoi aftësia individuale, për të kaluar kundërshtarin. U ndje mungesa e Asanit i cili për fatin e mirë të Partizani i ka këto aftësi, me raste edhe e tepron. Të them të drejtën isha përgatitur të prisja shumë nga kjo ndeshje, por dha pak”, shpjegoi Hafizi në “SuperSport”.
“Nuk pat larmi në lojën sulmuese, skuadrat ishin vendosur mirë në mbrojtje e mesfushë dhe kjo kufizoi skuadrat, sidomos nga Partizani. Edhe Kukësi sot duhej të synonte më shumë, të kërkonte më shumë meqë Partizani kishte vetëm një sulmues dhe probleme përpara. Një skuadër që pretendon për të dalë kampion, me 5 pikë mbrapa nuk mund të presë shumë. Pse të mos shfrytëzonte këto momente, se Kukësi është skuadër e mirë?”, tha Hafizi.