Ndeshja e kthimit e Superclasico mes River Plate dhe Boca Juniors do të luhet më 9 dhjetor në Madrid dhe ky është një vendim i pakthyeshëm. Ka qenë kjo deklarata e dhënë sot nga presidenca e Conmebol, pavarësisht kundërshimit të dy skuadrave të Buenos Aires, që nuk dëshironin të udhëtonin deri në Madrid për këtë sfidë, larg tifozerive të tyre. Presidenti i Conmebol, Alejandro Dominguez, ka komunikuar personalisht me të dyja klubet dhe ka shtuar se shitja e biletave ka nisur dhe ky proces nuk do të kthehet pas.
Numri 1 i Conmebol tha se ka marrë besën nga presidentët e dy klubeve, Daniel Angelici (Boca Juniors) dhe Rodolfo D’Onofrio (River Plate) se kjo finale e dytë do të luhet në stadiumin “Santiago Bernabeu” me 100%. “Nëse ka një gjë për të cilën jam i sigurtë është se kjo ndeshje do të luhet në Madrid dhe asgjë nuk do ta kthejë këtë vendim”, tha Dominguez, presidenti i Conmebol, që ka konfirmuar gjithashtu se biletat për këtë ndeshje do të blihen përmes kartave të identitetit, për motive sigurie dhe se biletat nuk mund të rishiten në tregun e zi.
