Kontestimet ndaj arbitrave kanë qenë gjithmonë pjesë e pandashme e futbollit. Duke nisur që nga tifozët, të cilët ndoshta janë të parët që kontestojnë, e për të vazhduar me lojtarët në fushë, e duke përfunduar me trajnerët apo zv/trajnerët që janë në stol.
Pikërisht te pjesa e fundit do të donim të ndaleshim. Episodi që ka ndodhur mbrëmjen e kaluar është me të vërtetë special dhe i veçantë, pasi zor se mund të jetë parë apo do të shihet diçka e tillë. Në ndeshjen midis, CSKA Sofies dhe Ludogoretsit, e vlefshme për kampionatin bullgar, trajneri i CSKA-së, Nestor El Maestro, është ulur në gjunjë duke u lutur përpara arbitrit të katërt.
Në ndeshjen që po luhej, sapo kishte përfunduar koha e rregullt dhe sfida ishte në barazim 1-1. Disa momente më parë, miqtë e Ludogorets mbetën me një lojtar më pak dhe arbitri i katërt akordoi vetëm dy minuta shtesë në fundin e takimit. Në këtë moment, numri një i stolit të CSKA-së, Nestor El Maestro, nuk ka duruar dhe është drejtuar nga arbitri i katërt duke u ulur në gjunjë për t’i kërkuar më shumë minuta.
🙏 Watch how CSKA-Sofia coach Nestor El Maestro asked for more added time after the referee gave just two minutes of stoppage time at the end of today's league decider against champions Ludogorets (1-1). El Maestro demanded six more minutes to be played… pic.twitter.com/zgyAWfYMtS
— mshumanov (@shumansko) December 6, 2018
Sipas trajnerit 35-vjeçar, duhet të kishte të paktën 6 minuta shtesë në atë takim. Momentalisht në Bullgari, kampionatin e udhëheq Ludogorets, i cili dominon prej vitesh futbollin bullgar dhe është kampionia në fuqi. CSKA-ja e Sofies është një ndër klubet më me histori, teksa vitet e fundit po tenton të rikthejë lavdinë e dikurshme.