Pak ditë më parë, presidenti i Sampdoria, Massimo Ferrero, deklaroi se sulmuesi Fabio Quagliarella nuk do të shitet, se është i paprekshëm edhe pse Milan insistoi për ta veshur kuqezi që në merkaton e janarit. Dhe për të mbajtur fjalën, skuadra e Sampdoria ka zyrtarizuar sot rinovimin e kontratës me sulmuesin 35-vjeçar deri në vitin 2020.
Këtë sezon, Quagliarella po shkëlqen në Serinë A, me 10 gola të realizuara në 16 ndeshje, duke thyer edhe rekordin personal, me 7 gola radhazi në 7 javët e fundit. Kjo paraqitje solli interesimin e Milanit, në krizë, por tashmë gjithçka është e mbyllur, pasi sulmuesi veteran do të vazhdojë të luajë me skuadrën e Sampdoria, që lufton për një vend në Europa League.
Ferrero u shpreh se rinovimi i kontratës së sulmuesit dhe kapitenit të skuadrës është dhurata e tij për Krishtlindje për tifozët e Sampdoria, që pritet të jenë të shumtë nesër në stadium për ndeshjen ndaj Chievo. Massimo Ferrero njihet si një nga presidentët me të çmendur të Serisë A, me gjestet dhe komentet e tij gjatë dhe pas ndeshjeve.
📄 La #Sampdoria brinda a capitan #Quagliarella, blucerchiato fino al 2020 ➡️ https://t.co/3VUpD1APFZ pic.twitter.com/N5nQEsv1G8
— U.C. Sampdoria (@sampdoria) December 25, 2018