Trajneri i Manchester City, Pep Guardiola, është i bindur se ai dhe Jose Mourinho do t’i kryqëzojnë rrugët e tyre përsëri në të ardhmen e afërt, pasi “armiku” i tij i vjetër u shkarkua nga Manchester United, të martën.
Guardiola dhe Mourinho krijuan një rivalitet të ashpër, që përshkoi tërësisht La Liga-n, gjatë kohës së tyre në stolat e Barcelonës dhe Real Madridit, respektivisht. Barça mburret me triumfin e sezonit 2010-2011, një fitore 5-0 në “El Clasico”-n e luajtur në “Camp Nou”.
Ajo “manita” i qëndron si “shpata e Demokleut” mbi kokën e portugezit, kur flitet për eksperiencën e tij si trajner në Spanjë. Pritshmëria ishte e lartë, kur rivaliteti mes tyre rifilloi në Manchester, në vitin 2016, por, pasi kaluan sezonin e parë në rolet e tyre, hendeku mes “qytetarëve” dhe “Djajve të Kuq” në Premier League ka qenë i madh.
Duke folur pas fitores me penallti të ekipit të tij ndaj Leicester City, në çerekfinale të “EFL Cup”, Guardiola këmbënguli se nuk duhet të ketë dyshime mbi aftësinë e Mourinhos për ta kapërcyer këtë pengesë të rëndësishme në karrierë. “Kur kjo ndodh, gjithmonë jam i trishtuar. Ky fat bashkëjeton me trajnerët gjatë gjithë kohës, – tha ai për “Sky Sports”.
– Kur situata nuk është e mirë, ne mbetemi vetëm. Gjithmonë jam afër kolegëve të mi. Në futboll, kjo ndodh. Ju e dini se çfarë ndodh, kur jeni të trishtuar, sepse rezultatet nuk janë të mira. Ai nuk ka nevojë për mua, është aq i fortë, sa së shpejti do të kthehet dhe do të luajmë përsëri”.
