Pasi të martën u bë i ditur lajmi për shkarkimin e Jose Mourinhos nga pozita e trajnerit të Manchester Unitedit, tanimë tri klube të mëdha evropiane, Real Madridi, Interi dhe Benfica, e kanë shprehur interesimin për portugezin.
Mourinho u shkarkua të martën nga pozita e trajnerit të Manchester Unitedit, pas dy sezoneve e gjysmë në këtë pozitë. Ai e humbi ndeshjen kundër Liverpoolit me rezultat 3-1, duke mbetur kështu 19 pikë larg liderëve.
Ish-sulmuesi legjendar i Manchester Unitedit, Ole Gunnar Solskjaer, tanimë është emëruar si trajner i përkohshëm deri në fund të këtij sezoni. Në maj të këtij viti, norvegjezi do të kthehet te klubi të cilin e drejtonte deri në dje, Molden.
Mirëpo, The Times raporton se tanimë tri klube të mëdha të Evropës e kanë kontaktuar Mourinhon për të filluar negociatat me të për emërimin në pozitën e trajnerit. Këto tri klube janë: Interi, Real Madridi dhe Benfica.
“Mourinho është i interesuar për një kthim në Real Madrid. Florentino Perez, presidenti i klubit, e emëroi në Santiago Solarin në pozitën e trajnerit në tetor, por në Spanjë besojnë se Real Madridi do ta kërkojë një trajner të ri gjatë verës”, shkruajnë gazetarët e The Times, Paul Hirst dhe Martyn Ziegler.
“Gjithashtu, Benfica dhe Interi janë duke e monitoruar situatën e Mourinhos. Interi, një nga ish-klubet e tij, mund të interesohet për të nëse e shkarkojnë Luciano Spallettin, pas dështimin në fazën e grupeve të Ligës së Kampionëve”.
