Ylli i kategorisë së rëndë në boks, Deontay Wilder, ka paralajmëruar nokaut brutal ndaj Tyson Furyt.
Pak para matjes, boksieri amerikan u shpreh se kundërshtari i tij është i tmerruar dhe madje paralajmëroi nokaut brutal.
“Është koha që të gjitha ndjenjat e mia, të gjithë energjinë time ta nxjerr”. Deontay Wilder gjatë matjes zyrtare.
“Ky është sport emocional, është sport i madh. Është mbrëmje e veçantë dhe unë di si ta liroj energjinë time”.
“Unë e kam shikuar shpesh në sytë e tij. Unë kam parë edhe më shumë frikë në sytë e tij. Tyson Fury është i frikësuar nga unë. Nuk më intereson çka thotë ai, se është në kokën time, çka është kjo, ai po tenton të bëjë diçka”.
“Tyson Fury është i tmerruar nga unë. Prisni një nokaut brutal”, ka theksuar Wilder para matjes zyrtare. Në skenë, gjatë matjes zyrtare, 33-vjeçari vazhdoi me retorikën e njëjtë, duke përsëritur se ai do të jetë kampioni.
Tensionet kanë qenë të vazhdueshme ndërmjet Deontay Wilder dhe Tyson Fury. “Është ndeshja më e rëndësishme, por jo më e vështira. Unë kam luftuar kundër boksierëve më të fortë se ai. Kundërshtari im i fundit ishte shumë më i fortë”.
“Ky është vetëm një hap i radhës për atë ku unë dua të shkoj. Siç kam thënë, do të ketë një kampion, një fytyrë, një emër dhe ai është Deontay Wilder”, ka deklaruar Wilder.
Sfida e madhe zhvillohet mëngjesin e të dielës (ora 06:00) në Staples Center të Los Angelesit. Për herë të parë dy boksierët do të luftojnë në këtë arenë.
