Milani ka kohë që planifikon 2-3 përforcime për merkaton e janarit, por realisht pengesat janë të shumta, edhe pse ide e emra ka plot.
UEFA ka vendosur bllokadë, duke mos lejuar asnjë shpenzim madhor, si pasojë e Fair Play financiar. Për këtë arsye, gjetja e më mesfushori cilësor dhe një sulmuesi të aftë të luajë në disa pozicione është një mision i ndërlikuar.
Cesc Fabregas është emri i ëndërruar për mesfushën, sepse spanjolli ka cilësi e eksperiencë dhe po kërkon ekip të ri, duke qenë se në Angli nuk po luan rregullisht.
Gjithsesi, Fabregas ka shumë oferta dhe Chelsea nuk e lëshon lehtë, pavarësisht se kontrata e mesfushorit skadon në verë.
E paqartë edhe çështja e sulmuesit, sepse Ibra u skarcua për shkak të moshës, ndërsa Muriel ka rënë dakord me kohë më Fiorentina-n.
Për këtë arsye, Leonardo e Maldini po shohin edhe fantazistin e Udineses Rodrigo de Paul, i cili luan në disa pozicione dhe do të shërbente edhe si sulmues i shtuar. Argjentinasi është teknik dhe i fuqishëm, luan edhe si anësor i majtë dhe tashmë ka fituar eksperiencë në Serinë A.
Për De Paul konkurrenca është e ashpër, sepse edhe Napoli e Interi kanë kohë që e ndjekin, ndërkohë që Udineses nuk ka dëshirë ta lëshojë që në janar, edhe pse ka marrë ofertë edhe nga Sevilla, rreth 16 milionë euro.