Trajneri i Chelsea, Maurizio, Sarri ka pranuar se nuk kishte dijeni për nënshkrimin e klubit me Christian Pulisic.
Lojtari amerikan u ble për shumën e 64 milionë eurove të mërkurën dhe pastaj u huazua përsëri te Borussia Dortmund për pjesën tjetër të sezonit.
Pavarësisht se Blutë e Londrës paguan tarifën e tretë më të lartë në historinë e tyre për 20-vjeçarin, trajneri italian tha se nuk ishte i sigurt nëse marrëveshja do të arrihej.
“Nuk dija asgjë për nënshkrimin e Pulisic, – tha Sarri për BBC, pas barazimit 0-0 të Chelsea me Southampton, të mërkurën. – Ata e kërkuan mendimin tim rreth tij një muaj më parë. Mendimi im ishte pozitiv dhe sot marrëveshja u krye, por nuk dija asgjë”.
Italiani përsëriti se nuk përfshihet shumë në transferimet e klubit, sepse fokusohet në çështjet që po ndodhin në fushë: “Unë nuk jam përgjegjës për merkaton, kështu që duhet të mendoj për ndeshjet, të cilat i luajmë çdo tri ditë. Unë vetëm mund t’i them mendimin tim klubit për një futbollist, që synohet të blihet”.
