Kristiano Ronaldo me shumë mundësi do të shpallet fajtor për mashtrim me taksat në Madrid, ditën e nesërme. Menjëherë pas ndeshjes së sotme ndaj Kievos, portugezi pritet që të udhëtojë për në kryeqytetin spanjoll, të dalë para gjyqtarit.
Ai pritet të marrë një dënim me burg prej 23 muajsh, por në Spanjë ky dënim mund të mos kryhet, nëse jepet për më pak se 24 muaj apo për shkelësit e herës së parë. Sipas marrëveshjes me zyrën e Prokurorit spanjoll, Ronaldo do paguajë rreth 19 mln euro, për t’ia hedhur vetëm me gjobë këtij dënimi.
Në 2017, një prokuror e akuzoi CR7 me 4 akuza, për mashtrim me taksat, nga vitet 2011-2014, me vlerë rreth 15 mln euro. Ronaldo akuzohet se ka përdorur kompani jashtë Spanjës, për të fshehur të ardhurat nga të drejtat e imazhit.
