Kalidou Koulibaly është mbrojtësi më i kërkuar aktualisht në Europë. 27-vjeçari senegalez që luan me Napoli në Serinë A kërkohet nga Manchester United, Juventus dhe PSG, tri ekipe me potencial financiar, duke parë pretendimet që ka skuadra napoletane (rreth 100 milionë euro).
Ditët e fundit është përfolur për një transferim te rivalët e Juventusit, por menaxheri i lojtarit nuk ka këtë mendim. “Koulibaly te Juventusi? Ai është shumë i lidhur me Napolin, me këtë klub dhe mbi të gjitha me këtë qytet. Nuk mendoj se do të veprojë si Higuain”, tha Bruno Satin, menaxheri i lojtarit.
“Kalidou mund të largohet nga Napoli dhe të luajë për një ekip tjetër në të ardhmen, pasi në sport gjithçka mund të ndodhë. Ai është një profesionist dhe kërkohet nga shumë skuadra të mëdha në Europë. Gjithsesi, e përsëris, ai e do shumë fanellën e Napolit”, tha Satin.
