Orët e fundit kanë qenë shumë të mbushura me evenimente për yllin e Juventus, Douglas Costa. Në fillim ka ardhur dëmtimi i pësuar në fushën e lojës që do ta detyrojë të mungojë në ndeshjen e ardhshme të kampionatit.
Më pas një aksident në të cilin ka mbetur e shkatërruar makina e tij dhe tani festa e ditëlindjes së Neymar-it në Paris. Sipas “Sport Mediaset”, klubi bardhezi nuk ka qenë aspak i kënaqur me “arratisjen” e lojtarit në Francë.
Nuk janë parashikuar gjoba për sulmuesin e Allegri-t, por drejtuesit janë bezdisur shumë, duke parë se nisma e tij nuk është në një linjë me stilin e klubit dhe profesionalizmin që kërkohet nga kampionë të një niveli të caktuar.
Gjithsesi, braziliani është paraqitur rregullisht ditën e sotme në stërvitje për të punuar me ekipin.
