Portieri i Luftëtarit, Shkëlzen Ruçi ishte heroi i skuadrës gjirokastrite në triumfin e sotëm ndaj Teutës, me penalltinë e pritur në minutën e 73-të. Në prononcimin pas ndeshjes gardiani elbasanlli u shpreh:
A ishte kjo ndeshje një fitore personale?
Gjithmonë jam stërvitur fort. Kritika ka për të gjithë, edhe për yje botërorë. Ndeshja e sotme ishte shumë e mirë, besoj se ishte një meritë e të gjithë.
Sa besim ju jep kjo fitore?
Humbja me Kastriotin ishte një zgjim për ne. Me ardhjen e Ahmatajt çdo gjë është rregulluar. Këtë vit nuk e diskutojmë që do të arrijmë mbijetesën. Çdo gjë do shkojë siç duhet.
Janë rregulluar gjërat në skuadër?
Janë rregulluar shumë gjëra. Çdo gjë është Ok. Në fazën e parë kemi pasur shumë probleme, tani çdo gjë është rregulluar.
11-metërshi ishte lëvizje instiktive?
Progni po shikonte me bisht të syrin në krahun tjetër dhe mendova që do gjuante në krahun e kundërt. Na janë dhënë shumë penallti kundër, kjo ishte e para që kam pritur.
A ishte përgatitur për një penallti kundër para ndeshjes?
E kishim përgatitur ndeshjen. Për mendimin tim Teuta është një ekip për tu shpallur kampion. Na vuri shumë në vështirësi. Do përpiqemi të shkojmë më lartë, pse jo dhe në Kupë.
