Vazhdon lufta mes Barcelonës dhe Realit të Madridit. Një histori që nuk ka fund në të gjitha sportet. Dy ditë më parë Barcelona fitoi titullin në basketboll dhe madrilenët u ankuan për arbitrimin. Xherard Pike thotë se kjo histori vazhdon pafundësisht dhe e quan një strategji të ekipit kryeqytetas. Ai foli edhe për barazimin ndaj Lionit dhe shanset që ka skuadra për t’u përmirësuar në të ardhmen.
Reali– “Reali e bën gjithmonë këtë gjë me arbitrat. Në të gjitha sportet vetëm ankohet për disa ndeshje, pastaj shkon të luajë në ‘Vanda Metropolitano’ kundër Atletikos. Aty e ndihmojnë dhe ata e qepin gojën. Është një strategji e pastër dhe duhet të mësohemi me këtë”, tha fillimisht Pike. Veterani i mbrojtjes së Barcelonës foli gjithashtu edhe për barazimin ndaj Lionit dhe shanset për t’u përmirësuar në këtë moment delikat të sezonit. Lioni- “Mendoj se Barcelona ishte më mirë sesa në ndeshjen e fundit në kampionat, edhe pse duhet të bëjmë më shumë. Krijuam shumë raste, por nuk gjetëm dot golin. Megjithatë, largohem i qetë dhe i lumtur në vija të përgjithshme”. Përmirësim- “Kishim pak përmirësim, por mund të ketë akoma më shumë. Është e vërtetë se nuk ishim shumë të saktë në sulm, por kjo gjë nuk më shqetëson. Kemi sulmues që në karrierën e tyre kanë shënuar shumë gola dhe herët apo vonë topi do të ndalet në rrjetë”.
