Është kapitulli i dytë i përballjes Beppe Marotta-Mauro Icardi. Referuar raportimeve të ANSA, dita e premte ka rezervuar një takim tjetër mes administratorit të deleguar të Inter dhe përfaqësuesve të sulmuesit argjentinas, i udhëhequr nga drejtuesi ligjor, Paolo Nicoletti, pasi më parë mes të dyve kishte patur një kontakt telefonik në mëngjes.
Sipas aludimeve, situata është në rrugë përmirësimi dhe mes palëve ka optimizëm, ndonëse gjithçka po trajtohet me qetësi. Vullneti i përbashkët është që këto dy muaj e gjysmë të fundit deri në përfundim të sezonit të menaxhohen me qetësi, për t’i dhënë fund makthit.
Nuk ka ende afate për rikthimin e Icardit në skuadër, në pritje të një tjetër takimi për të mbyllur përfundimisht këtë çështje. Ndërkohë, sulmuesi argjentinas edhe të premten është stërvitur individualisht, duke eliminuar çdo shans të prezencës së tij në ndeshjen e ardhshme të zikaltërve ndaj Spal.
