Futbolli ka dhe fatin brenda! Karriera e futbollistëve herë përparon nga një fraksion sekonde, e herë tjetër ngec në vend nga një dëmtim i papritur. Një nga lojtarët e pafat të Superiores tonë momentalisht është Bruno Telushi. Vlonjati u afrua te Partizani si një bast, jo për shkak të cilësive të tij futbollistike, por prej karakterit shpërthyes.
Mesfushori heshti çdo kritikë dhe nga ndeshja në ndeshje u kthye në liderin e “demave”. Të këtij ekipi që mund të shpallet kampion. Telushi është kthyer në “gjeneral”, nisur nga festimi i golave të tij. Rrjeta që këtë sezon kanë qenë të shpeshta, madje dhe në takimin e fundit ndaj Teutës la fushën pas zhbllokimit të rezultatit dhe mes dhimbjeve përfundoi në spital.
Diagnoza u gjet më e keqe se ishte menduar fillimisht. Vlonjati ka ajër në mushkëri dhe po mbahet nën vëzhgimin e rreptë të doktorëve. Lajmi i fundit ka përkeqësuar akoma më shumë situatën në kampin e kuq, pasi vlonjati duhet të operohet. Në kushte të tilla me shumë mundësi, kampionati mund të konsiderohet i mbyllur për “gjeneralin” që e la “ushtrinë e tij” në gadishmëri të plotë.
