Mario Mandzukic është gati të nënshkruajë kontratën e re, që e zgjat jetën e tij si bardhezi edhe për një vit. Marrëveshja aktuale i skadon më 2020, ndërsa e reja do të ketë limit vitin 2021. Kjo do të thotë edhe dy sezone të tjera, përveç atij aktual, gjatë të cilit “bomber” kroat do të fitojë rreth 4.5 milionë euro në sezon, plus bonuse të lidhura me arritjet personale dhe ekipore. Marrëveshja është arritur në mënyrë substanciale dhe do të ratifikohet në ditët në vijim.
Njoftimi mund të jetë i afërt, direkt pas ndeshjes kundër Atletico Madridit. Për trajnerin Massimiliano Allegri, kroati është një nga paprekshmit. Ai e shikon Madzukic si partner ideal të Cristiano Ronaldos, njësoj siç ishte Benzema për yllin portugez te Real Madridi. Më 21 maj, Mandzukic do të bëhet 33 vjeç, çka do të thotë se kontrata e re do t’i skadojë sapo të ketë regjistruar 35 vite mbi supe.
