Pas fitores historike 3-1 ndaj PSG-së në Paris dhe kualifikimit në çerekfinalet e Champions League, skuadra e Manchester United rikthehet të luajë në Premier League. Përballë “djajve” është skuadra e Arsenal, një përballje e fortë mes dy ekipeve që synojnë një vend mes “top-4” më të mirave në fund të këtij sezoni.
Për këtë arsye, trajneri Ole Gunnar Solskjaer kërkon nga skuadra që të ulë euforinë dhe të kthehet me këmbë në tokë, pasi tashmë për United nis një sfidë tjetër. Po aq e rëndësishme se ajo ndaj PSG-së, pasi 3 pikët do të mbajnë “djajtë” në vendin e katërt.
“Tani i rikthehemi realitetit tonë, luajmë sërish në Premier dhe përballë kemi një ekip të fortë si Arsenal. Pavarësisht kësaj, nuk kemi asnjë problem. Kualifikimi në çerekfinalet e Champions nuk është një çudi, pasi ai është vendi ku i takon Manchesterit.
Ajo që më tremb është euforia e tepërt, pasi nuk kemi shumë kohë për të rikuperuar dhe na duhet të hidhemi sërish në sulm, për një objektiv tjetër. Ndaj duhet të jemi realistë, me këmbë në tokë dhe të kuptojmë se kjo është një sfidë tjetër. Skuadrës do t’i jap të njëjtat këshilla si gjithnjë, të luajnë për të nderuar fanellën”, tha Solskjaer.
