Një tifoz i Manchester United po lufton për jetën, pasi u godit me thikë nga një shofer taksie, pas fitores në mbrëmjen e të mërkurës ndaj Paris Saint-Germain në Champions League.
Sipas raportimeve të “Sky News”, tifozi 44-vjeçar ishte në shoqërinë e tre tifozëve të tjerë, kur shoferi i tërbuar i sulmoi ata teksa këndonin për fitoren dramatike të “Djajve të Kuq” me rezultatin 3-1 në kryeqytetin e Francës.
Referuar dëshmieve, tifozi 44-vjeçar kishte ndërhyrë për të ndalur shoferin, teksa ky i fundit kishte nxjerrë një thikë të madhe për të kërcënuar një tifoze femër.
Në atë moment shoferi është kthyer dhe e ka goditur në gjoks me thikë, duke e lënë atë të shtrirë në dysheme, në luftë për jetën.
Viktima u transportua për në spital dhe iu nënshtrua një ndërhyrje emergjente për të larguar hemoragjinë që kishte depërtuar në mushkri. Policia e Francës ka arrestuar një të dyshuar në lidhje me sulmin horror.