“Këto janë netët e mëdha, ato fantastike: netët e Champions League”. me këto fjalë e ka përshkruar Cristiano Ronaldo-n sfidën e ardhshme të Juventus-it kundër Atletico Madrid.
Portugezi ka bërë të ditur për Juventus TV se pret me padurim që të zbresë në fushën e lojës: “Skuadra ka besim se mund të bëjë një ndeshje të madhe, ashtu si edhe unë. Mund të jetojmë me të vërtetë një natë speciale, në fushën e lojës dhe në shkallët e stadiumit”.
Ronaldo e njeh shumë mirë Atletico Madrid-in, me të cilin është përballur shumë herë: “Është një skuadër e fortë, këtë e dinë të gjithë. Detajet do të bëjnë diferencën, por ne duam të kualifikohemi në çerekfinale. Ky është futbolli, askush nuk e priste që të humbnim në ndeshjen e parë dhe ne duam të japim një përgjigje të madhe në shtëpinë tonë”.
“Po bëjmë një sezon shumë të mirë dhe kemi dy objektiva: Champions League dhe kampionatin. Nuk kam asnjë sekret. Unë e adhuroj këtë sport dhe për mua është një kënaqësi të shënoj dhe të ndihmoj ekipin që të fitojë. Tifozët? U them që të jenë optimistë dhe të kenë besim. Përmbysja është e mundur, por kemi nevojë për ndihmën tuaj. Get ready to comeback!”.
