Trajneri i Kombëtares braziliane të futbollit, Tite, publikoi listën me 23 lojtarët që do të grumbullojë për miqësoret në fundin e muajit mars dhe nuk mungojnë surprizat.
Tekniku i Seleçaos ka vendosur t’i besojë një vend në përfaqësuese talentit të Milanit, Lucas Paqueta, një futbollist që pasi ka impresionuar në kampionatin italian në pak ndeshje, fitoi edhe admirimin e trajnerit të Brazilit.
Paqueta, i cili debutoi me ekipin në shtator në miqësore, duke koleksionuar 55 minutat e para të lojës, gjithsesi nuk do të jetë e vetmja risi në grumbullimin e Brazilit për miqësoret ndaj Panamasë dhe Republikës Çeke.
E gjithë vëmendja e tifozëve është përqendruar në shpërthimin e momentit, Vinicius Junior, që do të ketë debutimin në Kombëtaren A, e me të gjitha gjasat do të jetë dhe në formacionin titullar.
Talenti i Realit të Madridit që po shkëlqen në La Liga me Blancos, do të shfrytëzojë mungesën e Neymar për të bindur edhe më skeptikët se e meriton një vend në ofensivën e Brazilit.
Këto dy miqësore në mars do të jenë të fundit për Seleçaon para listës paraprake për Kupën e Amerikës.
Me përjashtim të modifikimeve të vogla dhe dëmtimeve, nga këto emra do të dalin edhe pjesëmarrësit e turneut.
