E ardhmja e De Gea te Manchester United nuk duket e sigurt. Nga Anglia shohin PSG si destinacion të mundshëm për portierin spanjoll, verën e ardhshme, me këtë të fundit që mendon se duhet ta përmbyllë eksperiecën në “Old Trafford”. Klubi anglez i ka paraqitur një propozim për ta rinovuar kontratën, por De Gea nuk ka pranuar deri tani.
Oferta që ai ka në tryezë nga parizienët është tepër tunduese, e parefuzueshme. Në këtë mënyrë, përballë rrezikut potencial, Solkskjaer, trajneri i Manchester United, ka evidentuar zëvendësuesit e mundshëm. Siç shkruan “Express”, Oblak dhe Jordan Pickford janë të vetmit, që e kënaqin dhe bindin trajnerin norvegjez.
Media në fjalë shpjegon se Pickford është disi më i lirë se Oblak. Slloveni, i cili po mbyll rinovimin e tij me Atletico Madrid, ka në këtë moment një klauzolë lirimi prej 100 milionë eurosh. Portieri slloven, së bashku me Ter Stegen, ka vlerën më të lartë në tregun e futbollit botëror, aktualisht, me një vlerësim prej 80 milionë eurosh.