Manchester United është në betejë me Chelsea, Arsenal dhe Tottenham për një vend në katërshen e parë të klasifikimit në Premier League, çka do të siguronte një biletë për në Champions League. Një sfidë të cilën ekipi i Solskjaer po e diskuton paralelisht me edicionin aktual të Champions League, ku duelon me Barcelonën për një vend në gjysmëfinale.
Pikërisht në këtë moment sa delikat, po aq edhe vendimtar për Manchester United, Paul Pogba konfirmohet si lideri i “Djajve të Kuq” duke vendosur një rekord personal që i bën dobi ekipit. Gjatë ndeshjes së të shtunës ndaj West Ham, Pogba kaloi United në avantazhin provizor 1-0, falë një goli të realizuar nga pika e bardhë e penalltisë.
Ishte sërish francezi edhe një herë tjetër me 11-metërsh që në të 80’ i dha avantazhin për të dytën herë “Djajve të Kuq” 2-1. Dy gola që kanë shndërruar këtë sezon në më produktivin e të gjithë karrierës së kampionit të botës në fuqi. Francezi tashmë numëron 13 gola të realizuar dhe 9 asiste në Premier League.
Gjithçka merr përmasa më të mëdha kur konsiderohet se Pogba u margjinalizua masivisht nga ish-trajneri Jose Mourinho për gjysmën e parë të sezonit. Gjërat ndryshuan si nata me ditën me ardhjen e trajnerit Ole Gunnar Solskjaer në krye të Manchester United, me ish-juventinin që ka shfaqur formë fantastike, duke shënuar plot 11 gola nën drejtimin e norvegjezit.
