Sezoni i parë për Arthur te Barcelona ka shkuar në mënyrën më të mirë të mundshme. Prezenca e tij në fushë ka sjellë siguri dhe klas në të gjitha ndeshjet e katalanasve, duke kryqëzuar gishtat se kanë gjetur një Xavi të ri.
Në një intervistë për “Marca”, braziliani ka rrëfyer ndjesitë e tij në klubet dhe marrëdhënien me shokët e skuadrës.
“Nuk prisja të luaja kaq shumë këtë sezon. Mendoja se do kaloja më shumë kohë derisa të përshtatesha, por shokët e skuadrës më kanë ndihmuar shumë”, tha 22-vjeçari.
Arthur u ndal të flasë ndjesitë në dhomat e zhveshjes, më konkretisht për Pique e Messi: “Pique është i gjatë dhe shumë i pashëm. Ai ka fytyrë të bukur dhe gjithmonë duket si një dhëndër në ditën e dasmës. Ai është i gatshëm për të bërë shaka me të gjithë.
Messi? Është i jashtëzakonshëm, si jashtë dhe brenda fushe. Ai e lexon futbollin si asnjë tjetër. Në dhomën e zhveshjes ai është lideri ynë. Ai është shumë inteligjent dhe gjithmonë flet me të gjithë. Akoma kam një ndjenjë të çuditshme, edhe sot jam i surprizuar kur e shikoj atë. E shikoj dhe them me vete: ‘Po, është Messi me të vërtetë’”, përfundoi braziliani.