Duken të largëta kohët, kur portieri i Milanit, Xhanluixhi Donaruma, kontestohej. I është kthyer në nivelin e tij më të mirë dhe ndaj Frozinones ishte vendimtar me pritjen e penalltisë, kur rezultati ishte 0-0. Në momentin më të komplikuar për Milanin ai ndryshoi fatin e ndeshjes. Trajneri Gatuzo e falënderoi, ndërsa tifozët i dedikuan disa kore gjatë dhe pas ndeshjes.
Nuk është e hera e parë këtë sezon, që Donaruma shpëton Milanin. Ai ka pasur një rendiment mjaft të lartë gjatë gjithë kampionatit. Ditët e fundit ka dalë sërish në skenë PSG-ja dhe në verë mund të rifillojë telenovela e mëparshme për portierin italian.
Kontrata e Donarumës me Milanin skadon në 2021-shin, por nuk përjashtohet mundësia që palët të takohen javët e ardhshme për zgjatjen e saj. Tani, “blindimi” i portierit Donaruma është kthyer në një prioritet për klubin kuqezi.