Mesfushori ganez, Thomas Partey, mbylli një sezon mjaft të mirë me fanellën e Atleticos së Madridit dhe ka tërhequr vëmendjen e shumë klubeve të mëdha europiane.
25-vjeçari ngjan shumë me francezin Paul Pogba, ndërsa menaxheri i tij e përshkruan si akoma edhe më të mirë, pasi përveç aftësisë për të organizuar lojën dhe shënuar gola, di të mbrojë mjaft mirë.
“Është një futbollist i ngjashëm me Pogba, madje mund të them edhe më i mirë se francezi, pasi impenjohet shumë më tepër në fazën mbrojtëse. Diferenca e vetme është që luan për Ganën dhe nuk ka kaq shumë media pas vetes, sa Pogba”, tha Jose Daniel Jimenez Pozanco.
Më pas menaxheri i Thomas zbuloi se mesfushori ka një klauzolë prishjeje të kontratës prej 50 milionë eurosh dhe se gjithçka mund të ndodhë këtë verë, duke mos përjashtuar largimin nga Atletico e Madridit.
