Lazio ka arritur të marrë një fitore mjaft të rëndësishme në transfertë duke mundur me rezultatin 1-2 skuadrën e Cagliarit.
Kjo fitore e arritur në një transfertë delikate, e ka afruar Lazion me Ligën e Europës, duke qenë se diferenca e pikëve është shumë e ngushtë.
Pjesa e parë e takimit, ka folur për lacialët ku pak minuta para fundit kanë arritur të gjejnë golin pas një aksioni mjaft të bukur dhe ishte Luiz Alberto ai i cili kaloi në avantazh skuadrën e tij.
Rastet nuk kanë munguar në pjesën e parë për asnjërën nga skuadrat megjithëse Lazio është treguar më superiore.
Në pjesën e dytë, Cagliari e ka kërkuar më shumë golin, por Correa ka realizuar golin e dytë për skuadrën e tij duke e lehtësuar gjithçka.
Kur dukej se gjithçka po përfundonte, Pavoleti ka lënë gjurmën e tij në këtë takim duke realizuar golin e vetëm për skuadrën e tij, por ky gol nuk ka mjaftuar për të prishur festën e Lazios.
Titullar në këtë ndeshje ka luajtur portieri belg Proto, i cili ka zënë vendin e Strakoshës së dëmtuar.
Aktualisht, Lazio renditet në vendin e shtatë, me një pikë më pak se Roma e Milani.
