Tirana ka dy dilema të mëdha për të zgjidhur deri të shtunën. Çështja e gjyqtarit të ndeshjes me Kastriotin dhe puna e tifozëve janë dy problemet e Tiranës. Teorikisht, klubi duhet të paguajë pesë milionë lekët që ndeshja e kampionatit të luhet me tifozë dhe jo pa përkrahës, ndonëse shenjat janë që nuk do të paguhen paratë dhe stadiumi do të jetë bosh.
Për këtë çështje ende nuk ka një vendim zyrtar nga ana e klubit Tirana. Nga ana tjetër, edhe pse jo zyrtarisht, nuk ka një kërkesë në FSHF për gjyqtarë të huaj. Duke parë sfidën e fundit me Kastriotin, ku gjyqtari e bëri “baltë”, vendësit mendojnë për një gjyqtar të FIFA-s, ose e shumta një gjyqtar të huaj. Kjo do të zgjidhte përfundimisht çështjet dhe dilemat e bardhebluve.
