Mesfushori i Kombëtares shqiptare, Odise Roshi, ka dalë në konferencë për shtyp për të folur për sfidat me Islandën dhe Moldavinë, të vlefshme për eliminatoret e EURO 2020.
Si shkoi java e parë e grumbullimit?
E kemi nisur mirë me trajnerin e ri. Stërvitjet kanë vajtur mirë. Stërvitemi çdo ditë, jemi të përqendruar.
Si ndiheni tani?
Për Panuccin vazhdojmë të kemi respekt. Reja është mjaft i komunikueshëm, e njohin të gjithë. Çdo gjë është perfekt. Stërvitja ka ritëm të mirë, po përqendrohemi fort.
Të gjitha dështimet i janë faturuar Panuccit…
Kemi bërë gjithmonë më të mirën. Nuk duhet të merremi çfarë ka kaluar, por të shohim të ardhmen.
Skema pritet të jetë 3-5-2, ju penalizon?
Kemi lojtarë të mirë, kualitet të mirë. Po e bëjmë çdo ditë ketë skemë. Unë jam i kënaqur, duhet të punosh shumë në të dyja fazat. Kam ardhur nga një dëmtim shumë i gjatë. Kam 2 muaj që kam filluar të luaj rregullisht. Ndihem mirë. Jam pothuajse 100%.
Sa besim keni se do të dilni mirë në Islandë?
Kanë pasur ekip të mirë, të fortë. I kam ndjekur edhe kundër Francës. Do të jetë ndeshje shumë e fortë për ta.