Pavarësisht se ka kaluar pjesën dërrmuese të sezonit si titullar në 11-shen e Gattusos, Tiemoue Bakayoko pritet të largohet nga Milani në fund të sezonit, për t’u rikthyer të paktën përkohësisht te Chelsea, ekip që ka edhe pronësinë e kartonit të tij.
Mesfushori francez është i huazuar me të drejtë blerjeje kundrejt 35 milionë eurove te Milani, por kuqezinjtë nuk kanë në plan të ushtrojnë këtë të drejtë, pasi sjellja e Bakayoko ndaj trajnerit Gattuso dhe një pjese të mirë të grupit, nuk ka qenë korrekte.
Megjithatë në orët e fundit mediat italiane raportojnë se në garë për shërbimet e mesfushorit francez, është futur pikërisht rivali më i madh i Milanit në futboll, skuadra tjetër e qytetit, Interi.
Zikaltrit kanë marrëdhënie mjaft të mira me përfaqësuesin e Bakayoko për Italinë, Federico Pastorello, dhe po negociojnë për një huazim me vlerën e 5 milionë eurove dhe të drejtë blerjeje në fund të sezonit, kundrejt 32 milionë eurove.
Këto shifra duhet të mirëpriten nga Chelsea, që nëse do të vijojë me Sarrin në pankinë, nuk ka ndërmend të mbajë në Londër francezin, i cili nuk shihet me sy të mirë nga ish trajneri i Napolit.
