Bayern Munchen ka vendosur të mos e ushtrojë të drejtën për të blerë përfundimisht kartonin e James Rodriguezit.
Kolumbiani prej dy sezonesh është pjesë e bavarezëve, ku ka luajtur në formën e huazimit nga Reali me të drejtë blerjeje për shumën 42 milionë euro.
Kjo marrëveshje, sipas akordit, është e vlefshme deri më 15 qershor.
Destinacioni i ardhshëm i tij mund të jetë kampionati italian, me konkretisht, te Napoli.
Qëndrimi ose jo i kolumbianit varej shumë nga vendimi i trajnerit Niko Kovac.
Ky i fundit ka vendosur që të mos e ketë nën urdhrat e tij sezonin e ardhshëm.
Në sezonin e parë te bavarezët, kur drejtoheshin nga Jupp Heynckess, James kishte një rol të rëndësishëm në skuadër.
Dëmtimet e shumta, por edhe mosaktivizimi, kanë qenë faktorë që e kanë penalizuar atë.
Tashmë mbetet për t’u parë nëse kolumbiani do të transferohet te Napoli apo diku tjetër, pasi në radhët e Realit të Madridit duket si diçka thuajse e pamundur.
