Tirana-Kukësi, ose finalja e sivjetshme e Kupës së Shqipërisë, do të gjykohet nga arbitrat më të mirë të Kategorisë Superiore. Ndeshja do të drejtohet nga një gjashtëshe e gjitha FIFA.
Kryesor do të jetë Enea Jorgji, ndërsa asistentët Ridiger Çokaj dhe Rejdi Avdo do të ndihmojnë elbasanasin. Të tre gjyqtarët janë edhe ata që janë dizenjuar nga UEFA për sfidën Ishujt Faroe-Spanjë, takim ky eliminator për Europianin 2020, që zhvillohet më 7 qershor. Veç treshes së mësipërme, gjyqtar i katërt do të jetë Denis Rexha, ndërsa gjyqtarët e linjës janë Eldorian Hamiti dhe Juxhin Xhaja.
Të gjashtë gjyqtarët janë më të vlerësuarit e sezonit futbollistik që sapo u mbyll dhe në toplistën e kryesorëve dhe asistentëve. Finalja e Kupës është sfida e fundit e sezonit 2018-2019.
