Për zyrtarizimin duhet të presim ende edhe disa ditë, por tashmë mund të themi me siguri, që pronari i ri i Fiorentinës do të jetë manjati italo-amerikan, Rocco Commisso.
Ky i fundit u takua për më tepër se 3 orë me vëllezërit Diego dhe Andrea Della Valle, në një zyrë në Milano dhe në fund ranë dakord për shitjen e aksioneve te Commiso, për shumën e 180 milionë eurove.
Sipas mediave italiane, klubi pritet të kalojë në duart e miliarderit Commisso brenda pak ditësh, ndërsa më pas pronari i ri do të nisë punën për të rindërtuar klubin, ku pritet të afrojë një sërë njerëzish të tjerë, si dhe një trajner të ri.
Gjithashtu një nga çështjet e para me të cilën do të duhet të përballet Commisso, është ajo e yllit të skuadrës, Federico Chiesa, i cili kërkohet me ngulm nga Interi e Juventusi, ndërsa klubi vjollcë synon ta mbajë akoma në Firence.
