Mbrëmjen e djeshme përfundoi sezoni i Champions League 2018-2019, me Liverpoolin që fitoi 2-0 finalen ndaj Tottenhamit.
Një ditë më pas, në profilin e saj zyrtar UEFA ka publikuar listën me emrat e 20 futbollistëve më të mirë të sezonit.
Bie menjëherë në sy fakti që Seria A përfaqësohet në këtë listë me një lojtar të vetëm dhe ai është Cristiano Ronaldo i Juventusit.
Por ka edhe surpriza të tjera. Mungon në listë një nga titullarët më të rëndësishëm të fituesit të kompeticionit, sulmuesi Mohamed Salah.
Mungon edhe Firmino dhe treshja e frikshme sulmuese e Liverpoolit përfaqësohet vetëm me Mane, megjithatë nga ky ekip bëjnë pjesë në listë edhe portieri Alison, mbrojtësit Van Dijk, Robertson dhe Aleksandër-Arnold, si dhe mesfushori Wijnaldum.
Në listë janë disa nga talentet e Ajaksit, bashkë me “veteranin” Tadiç, por edhe emra të tjerë të njohur si Mesi, De Bruyne dhe Sterling.
