Futboll Sport

U SHKARKUA NGA FEDERATA E MALIT TË ZI/ Trajneri Ljubisa Tumbakovic pranë stolit të Serbisë

Një ditë pasi Federata e Futbollit e Malit të Zi e shkarkoi nga posti i trajnerit të ekipit kombëtar, për shkak se nuk kishte pranuar ta udhëhiqte skuadrën kundër Kosovës, Ljubisa Tumbakovic, thuhet të jetë kandidat për pozitën e trajnerit të Serbisë.

Tumbakovic, bashkë me dy futbollistë me prejardhje serbe – vendosen të mos merrnin pjesë në ndeshjen e Malit të Zi kundër Kosovës e vlefshme për kualifikime në Kampionatin Evropian 2020, e cila përfundoi pa fitues 1:1 të premten në Podgoricë – për shkak të presionit të madh politik nga Beogradi.

Si pasojë, Federata malazeze e shkarkoi Tumbakovicin nga posti i trajnerit një ditë pas ndeshjes. Tani që ai është i papunë, spekulohet se mund ta marrë drejtimin e Kombëtares së Serbisë.

Vijesti në Mal të Zi shkruan se Tumbakovic është ndër dy kandidatët me serioz për postin e trajnerit të Serbisë, bashkë me Dragan Stojkovicin.

Serbia u turpërua nga Ukraina duke u mposhtur bindshëm 5:0 në një ndeshje kualifikuese për Kampionatin Evropian 2020 dhe e ardhmja e trajnerit Mladen Krstajic është në dyshim të madh.

Duke iu referuar mediave serbe, Vijesti shkruan se njeriu që e la Malin e Zi në baltë në ndeshje ndaj Kosovës për shkak të presionit nga Beogradi, tani mund ta zëvendësojë Krstajicin në postin e trajnerit të Serbisë.

Related posts

Ish-kapiteni i “Tre Luanve” përkrah SHBA-në, Kanadanë dhe Meksikën për Botërori 2026

Sadik.Autor

BESA “pazar” në Kosovë, synime madhore për sezonin e ardhshëm

Isa.Autor

RUSI 2018/ Nigeri-Argjentinë, ndeshja për “jeta a vdekje” e Messi-t

Sadik.Autor

Leave a Comment