Xherdan Shaqiri është shpallur kampion i Evropës për të dytën herë në karrierë, pasi skuadra e tij, Liverpooli, triumfoi ndaj Tottenhamit me rezultatin 2-0 në finalen e këtij edicioni të Ligës së Kampionëve.
Për këtë triumf, Liverpooli festoi sot në rrugët e qytetit me mijëra tifozë dhe natyrisht këtë e kanë shijuar edhe futbollistët, një ndër ta edhe Shaqiri.
Nga autobusi ku festuan për të paktën 3 orë, Shaqiri tha për festën: “Është e mrekullueshme. Nuk prisja kaq shumë njerëz, është thjesht fantastike se sa shumë e duan këtë klub. Jemi të lumtur për titullin.
Vetëm sa fituam një titull të mrekullueshëm dhe duhet të festojmë me tifozët, sepse nuk ndodh shpesh të fitosh këtë trofe. Jam i lumtur, siç mund ta shihni të gjithë janë të lumtur. Jam duke e shijuar këtë atmosferë dhe do ta mbajë mend për një kohë të gjatë.
Kam fjetur vetëm 2 orë. Por më duket që kam fjetur shumë, sepse po festojmë një trofe fantastik. Jam i lumtur, kështu që mund të festoj një javë pa fjetur”.
