Armiqësitë mes Interit dhe Mauro Ikardit, vazhdojnë të jenë prezente në shtëpinë zikaltër.
Është portali pranë Interit, “FcInterNeës”, i cili zbulon se mes trajnerit Antonio Konte, dhe agjentes së argjentinasit, Vanda Nara, ka pasur një bisedë telefonike.
“Përshëndetje, jam Antonio…” – mësohet të jetë shprehur në fillim të telefon tekniku, drejtuar Vandës. Në bisedën mes tyre, Konte e ka bërë të qartë se Ikardin nuk e ka në projektin e tij, dhe ishte i vendosur as të mos e grumbullonte në Lugano, ku skuadra do të nisë përgatitjet për sezonin e ri, në 8 korrik.
Një sinjal i fortë dhe i qartë, të cilit Vanda iu përgjigj menjëherë duke i kërkuar Marotës, ta lërë të lirë Ikardin. “Meqë nuk e doni Mauron më, dhe nuk e shihni si një pjesë të projektit, atëherë ne duam ndërprerjen e kontratës” – mësohet të jetë shprehur Vandë, në kundërpërgjigjen e saj.
Tashmë, kjo është kthyer në një lojë shahu, ku secila palë bën lëvizjen e saj, por Interi kurrsesi nuk do dëshironte që ta humbte me parametra zero sulmuesin, edhe pse vlera e tij ka rënë shumë pas mosmarrëveshje me klubin ditët e fundit.
Pas “derës” ndërkohë, gjendet sërish Juventusi, që është gati ta marrë Ikardin, e t’i ofrojë një kontratë 5-vjeçare, me një vlerë prej 8 milionë eurosh në sezon. Mbetet të shihet si do të shkojë “telenovela” e tij tashmë.
