Elis Bakaj vijon të dhurojë spektakël në kampionatin bjellorus. 32-vjeçari ishte protagonist absolut në triumfin 3-2 të skuadrës së tij Shakhtjor Soligorsk ndaj FC Minsk, duke realizuar dopietë si dhe asistoi në golin e dytë të shënuar nga Burko.
Miqtë kaluan të parët në avantazh me anë të Evgeni Shevçenkos në minutën e 9-të. Vetëm 4 minuta ka zgjatur festa e FC Minsk, pasi në minutën e 13-të, Bakaj me një perlë nga goditja e dënimit vendosi baraspeshën.
Skuadra kundërshtare surprizon sërish teksa në minutën e 15-të, kalon sërish në avantazh, me po të njëjtin autor, sulmuesin Shevçenko.
Minuta emocionuese, teksa Shakhtjor arrin të barazojë pa u mbushur minuta e 21-të me anë të futbollistit Burko, i cili pas krosimit të Bakajt, gjen rrugën e rrjetës. Pjesa e parë përfundon me shifrat e barabarta 2-2.
Si të mos mjaftonte epërsia e vendasve, në minutën e 66-të, Minsku mbetet me 10 lojtarë, pasi Vidiç ndëshkohet me karton të kuq.
Për t’i dhuruar fitoren skuadrës së Shakhtjor mendoi sërish Elis Bakaj, i cili në fundin e ndeshjes realizoi golin e fitores nga pika e bardhë e penalltisë.
Me këtë triumf, skuadra e futbollistit shqiptar u ngjit në vendin e 3-të në renditje, në kuotën e 31 pikëve, 2 më pak se kryesuesit e Brestit, të cilët kanë dhe 1 ndeshje me pak.
