Ditën e sotme do të luhen edhe ndeshjet e kthimit të turit të parë eliminator në Ligën e Europës. Në këtë kompeticioni marrin pjesë edhe 3 ekipe shqiptare si Kukësi, Teuta dhe Laçi. Në letër të tre skuadrat e Kategorisë Superiore nisen jo të favorizuara, megjithatë do të provojnë deri në fund për të marrë maksimumin.
Kështu, Kukësi do të presë në ‘Elbasan Arena’ orën 20:00 ekipin e Debrecenit. Sfida e parë në Hungari u mbyll me triumfin e vendasve në rezultatin 3-0. Verilindorët mund të kapen fort te loja e mirë e zhvilluar, sidomos në pjesën e parë, teksa duhet të shfrytëzojnë çdo rast të paraqitur. Ndërkohë që, vëmendje duhet t’i kushtohet edhe prapavijës, pasi një gol i miqve mund t’i jepte përfundimisht fund shpresave të Kukësit. Thuajse i njëjti diskutim vlen edhe për Teutën. ‘Djemtë e Detit’ do të presin në stadiumin ‘Niko Dovana’, në orën 17:00, Ventspils. Skuadra letoneze ka triumfuar në takimin e parë me rezultatin 3-0, teksa durrsakët kanë një ‘mal’ para për të kaluar.
Sakaq, më pozitive paraqitet situata për Laçin. Kurbinasit do të udhëtojnë në transfertë drejt Izraelit, teksa në orën 19:30, do të zbresin në fushë për përballjen ndaj Hapoel Ber Sheva. Në takimin e parë, të besuarit e trajnerit Sulejman Starova barazuan me rezultatin 1-1. Edhe pse, Ber Sheva mund të jetë disi më të favorizuar prej golit në fushën kundërshtare, sërish Laçi ka shpresë për të tentuar surprizën.
