Xhixhio Donaruma nuk do të lëvizë nga Milani për disa vite, ose më saktësisht, ky është mendimi që kanë në kokë drejtuesit kuqezinj, të cilët kanë hequr nga merkato portierin italian për të cilin përflitet vazhdimisht se është pranë largimit nga radhët e kësaj skuadre.
Në të kaluarën është folur shpesh për interesimin e klubeve jashtë Italisë, por edhe Juventusit në Serinë A, me tifozët të cilët kanë qenë edhe të paduruar në disa raste duke e kontestuar portierin publikisht sa herë që menaxheri i tij Mino Raiola lëshonte një sinjal lamtumire. Por sot, Paolo Maldini ka bërë të ditur se plani i klubit nuk ishte ai i largimit të një futbollisti të tillë.
“Për rëndësinë që ka te Milani, në futbollin italian e botëror, janë thënë shumë fjalë. Ne e kemi mes nesh dhe ideja jonë e parë që kemi në kokë është ajo për ta mbajtur për shumë vite. Në këtë moment ky është pozicioni që mbajmë”, theksoi trajneri i cili foli më pas edhe për merkaton në hyrje të skuadrës.
“Merkatoja është e gjatë, shumë e gjatë. Ka disa prioritete që na janë sinjalizuar nga trajneri dhe do të mundohemi që ta kënaqim në këto pika. Edhe yjet janë mes futbollistëve që kërkon trajneri, do të jetë në dorën tonë t’u japim të rinjve disa udhëzues më ekspertë”, deklaroi ish-mbrojtësi i Milanit.
