Skuadra e SPAL i është bashkuar klubeve të tjera të mëdha italiane që kanë mbushur radhët e tyre me futbollistë shqiptarë jo vetëm në ekipin e parë. Pak ditë më parë, klubi i qytetit të Ferrarës firmosi me Etrit Berishën, duke e kthyer gardianin e kuqezinjve në zgjedhjen e parë për portën e saj në edicionin e ardhshëm në Serinë A.
Por tashmë, duket se ka hedhur sytë edhe nga të rinjtë e talentuar që kanë një të ardhme të garantuar në futbollin përtej Adriatikut. Kështu, sot ka zyrtarizuar transferimin e një mesfushori me shumë perspektivë, 17-vjeçarit Altin Kryeziu, i cili në të kaluarën ka qenë pjesë e akademisë së Triglav Kranj në Slloveni.
Djaloshi vlerësohet si një mesfushor shumë cilësor e nuk është rastësi që ai ka qenë edhe pjesë e përfaqësueses U17 të Kosovës, duke marrë pjesë me këtë të fundit në eliminatoret e Europianit të kësaj grupmoshe.
