Klubi i Chelsea, me një shënim në faqen e saj zyrtare ka njoftuar, se ka marrë masa ndëshkimore ndaj 6 tifozëve të saj.
Shkaku për këto masa, janë veprimet e tyre raciste ndaj Raheem Sterling në ndeshjen Chelsea-Manchester City e zhvilluar më 8 dhjetor 2018.
Në shënimin e saj Chelsea, njoftonte se klubi ka dënuar përjetësisht njërin prej tifozëve, i cili në ndeshjen e 8 dhjetorit fyeu rëndë Sterling.
Kamerat e stadiumit kishin kapur momentin kur tifozi fyente lojtarin e Manchester Cityt.
Për 5-së tifozët e tjerë, masa e marrë është më e lehtë, ata janë dënuar me 1-2 vjet përjashtim nga stadiumi, pasi e kanë pranuar fajin dhe ishin penduar për veprimin e kryer.
Klubi londinez citonte disa fjalë për këto masa të marra.
” Jemi krenarë që jemi një klub gjithëpërfshirës, ku njerëzit e racave dhe kulturave të ndryshme janë të mirëseardhur tek ne. Të gjithë tifozët tanë duhet të mbajnë mend gjithmonë se çdo fjalë ose veprim i tyre mund të fyejë njerëzit përreth tyre dhe tërë komunitetin. Ne do të vazhdojmë të punojmë dhe bashkëpunojmë me mbështetësit tanë për të frenuar çdo formë diskriminimi “.