Brazil-Argjentinë i lë vendin, gjysmëfinales së dytë të Copa America, asaj mes Kilit dhe Perusë, që do të përcaktojë edhe skuadrën që do të sfidojë Seleçaon në finalen e madhe të 7 korrikut.
Kampionët e dy edicioneve të fundit janë favoritë për të prekur finalen e tretë radhazi, por në asnjë mënyrë nuk duhet të nënvlerësojnë Perunë, pasi mund ta pësojnë si Uruguai, që edhe pse ishte favorit për t’i shkuar deri në fund turneut, u eliminua nga Guerrero me shokë në çerekfinale pas goditjes së penalltive.
Të dyja skuadrat kanë një brez lojtarësh të “plakur”, por edhe me shumë eksperiencë, të cilët këtë Copa America e kanë mundësitë e tyre të fundit për të fituar një trofe të rëndësishëm me kombëtaren.
Nga njëra anë janë Medel-Isla-Vidal e Sanchez, ndërsa në krahun tjetër Guerrero dhe Farfan.
E sigurtë është që sot në orën 2:30 me atë shqiptare në “Arena do Gremio” në Porto Alegre parashikohet një sfidë shumë e luftuar dhe një rivalitet të egër, pasi si Kili ashtu edhe Peruja ëndërrojnë finalen, ku do të përballen me ekipin organizator të turneut, Brazilin.
