Drejtuesit e Partizanit janë hedhur fuqishëm në merkato. Ata kanë realizuar deri më tani nëntë përforcime.
Afrimet më të shumta kanë ndodhur në fazën sulmuese, duke kompletuar edhe boshllëqet e trashëguara.
Pas përfundimit të aventurës evropiane klubi do t’i nënshtrohet një tjetër procesi, i cili do të jetë i gjithi në funksion të sezonit të ri, Kupë dhe kampionat. Pjesa e dytë e merkatos pritet të shoqërohet me afrime, rinovime, por edhe spastrime.
JURGEN BARDHI
Sulmuesi nga Fushë-Kruja, Jurgen Bardhi, në karrierën e tij si futbollist njeh vetëm fanellën e kuqe, pasi me atë po rritet te Partizani, duke qenë pjesë e skuadrës së parë që 17 vjeç. Por, “demat e kuq” rrezikojnë që ta humbasin 21- vjeçarin në këtë pjesë të mbetur të merkatos.
Bardhi nuk ka pasur mundësi të luajë në Champions dhe Ligën e Evropës, për shkak të një dëmtimi të trashëguar nga fund-sezoni i shkuar. Sulmuesi është pranë rikthimit të plotë, por pas përfundimit të pjesëmarrjes në Kupat e Evropës drejtuesit duhet të zgjidhin edhe të ardhmen e futbollistit.
Bardhi është pranë përfundimit të kontratës dhe Partizani rrezikon që ta humbasë me parametër zero.
Kështu që, ekzistojnë dy mundësi për drejtuesit e klubit: të rinovojnë kontratën me Bardhin ose ta shesin jashtë vendit. Mësohet se drejtuesit po i shqyrtojnë të dy opsionet, madje flitet se ekziston edhe një pistë në Austri për shitjen e lojtarit.
Sipas transfero-market vlera e kartonit e sulmuesit 21 vjeçar është 600 mijë euro dhe kjo është një shumë e konsiderueshme për një ekip shqiptarë.
