Real Madridi i ka bërë kërkesë La Ligas që tri ndeshjet e para të sezonit 2019/20 të kampionatit spanjoll t’i luajë në transfertë për shkak të punimeve në stadiumin “Santiago Bernabeu”.
Punimet për rinovimin e stadiumit, që pritet të zgjasin tre vjet e gjysmë, do të nisin për pak ditë në mënyrë që të mos pengohet orari i ndeshjeve.
Në fakt, Reali do të bëjë ndërrimin e kulmit të stadiumit dhe do të shtojë një tribunë për sezonin e ri përpara se të fillojë me punimet e tjera, shkruan Marca.
La Liga orarin e ndeshjeve për edicionin e ri do të publikojë të enjten (4 korrik), kurse kërkesa e Realit pritet të aprovohet.
Njësoj si Reali veproi edhe Atletico Madridi para dy viteve, kur stadiumi “Wanda Metropolitano” ishte në prag të përfundimit.
Nëse kërkesa e Realit aprovohet, atëherë sipas të gjitha gjasave këtë vit ndeshja për trofeun miqësor “Santiago Bernabeu” nuk do të zhvillohet, ose mund të shtyhet.