Shumëkush e cilësoi të çuditshme mungesën e Rijad Mahrez në Superkupën e Anglisë, pasi mesfushori algjerian ishte kthyer prej disa ditësh në stërvitje me Mançester Sitin dhe nuk kishte shfaqur ndonjë dëmtim për të munguar në ndeshjen ndaj Liverpulit. Edhe pse kampionët e Anglisë në fund e mbyllen me sukses ndeshjen, duke bërë të tyrin trofeun, mediat kanë kërkuar shpjegime nga Guardiola për situatën e Mahrez dhe trajneri i ka çuditur të gjithë me shpjegimin e tij.
“Rijad mori një mjekim, vetëm pak, por nuk e dinim përbërjen e asaj që ka marrë dhe rrezikonte në kontrollin antidoping”, shpjegoi Guradiola pata gazetarëve të çuditur të cilët nuk e kishin parashikuar kurrsesi një përgjigje të tillë për algjerianin që ishte kthyer në stërvitje si Kampion i Afrikës.
Sipas mediave angleze, Mahrez kishte pasur probleme me sytë dhe për këtë arsye kishte marrë ilaç me pika gjatë pushimeve. Por nuk kishte qenë një ilaç i këshilluar apo kontrolluar nga klubi, ndaj për të evituar surpriza të pakëndshme, ishte vendosur që lojtari të mbetej jashtë kësaj sfide.
