Sioni ka mundur sot me shifrat 3-1 skuadrën e Zyrih në një sfidë ku protagonistë kanë qenë thuajse të gjithë futbollistë shqiptarë.
Gjithçka filloi me një gol të shpejtë të Ermir Lenjanit i cili me një gjuajtje të shkëlqyer nga jashtë zonës kaloi topin mbi portierin kundërshtar dhe dërgoi sferën në rrjetë. Shifrat u barazuan nga Mahi dhe më pas ishte Kololli ai që kishte mundësinë të kalonte në avantazh Zyrih. Mesfushori i Kosovës, i futur në pjesën e dytë në fushë, ekzekutoi një penallti në mënyrën më të gabuar, duke e çuar topin jashtë.
Pastaj ishte radha e një tjetër futbollisti shqiptar të linte shenjë në ndeshje, Pajtim Kasamit, i cili i aktivizuar si zëvendësues, me ekipin e tij që kishte mbetur me 10 lojtarë, shënoi dy herë në minutat 81 dhe 83, për t’i dhuruar suksesin skuadrës së SIonit.
