Dejvid Bekham ndodhet me pushime në Itali në pritje për të nisur sezonin e parë si president kur në 2020-ën klubi i tij Majemi do të jetë pjesë e kampionatit kombëtar të futbollit amerikan. Anglezi kishte marrë në konsideratë edhe Xhenaro Gatuzon në rolin e trajnerit, teksa lidhja e tij me Milanin duket se ka infektuar edhe të birin.
Kruz Bekam ka postuar në rrjete sociale një fotografi së bashku me babain e tij, Dejvid. Bie në sy që fëmija i dytë i legjendës britanike ka pozuar me një fanellë të Milanit. Në fakt, prej ditësh e gjithë familja ndodhet në Toskanë, sepse edhe në profilin “Instagram” të Viktorias nuk mungojnë pozat në Firence, por edhe më në jug (Pulje).
Sipas mediave italiane, qëllimi i këtij rikthimi të Dejvid në Itali nuk ka të bëjë vetëm me relaksin. Si president i një klubi, ai kërkon përforcime për ekipin e tij, çka duket se do ta bëjë duke i rrëmbyer Juventusit U-19 mbrojtësin Kristian Makun. 19-vjeçarit i përfundoi kontrata me bardhezinjtë dhe pasi nënshkroi një akord disamujor me venezuelanët e Zamoras, në janar të 2020 do të kalojë përfundimisht te Majemi i Bekamit.
