Përfaqësuesja shqiptare U-19 është mundur edhe në ndeshjen e dytë të saj në turneun ku po merr pjesë në Zagreb, duke u mposhtur këtë radhë nga Dinamo vendase.
Ashtu si në ndeshjen e një dite më parë ndaj Real Madridit, edhe sot kuqezinjtë e drejtuar nga Nevil Dede janë mundur me shifrat 2-1, edhe pse duhet theksuar se këtë herë kanë zhvilluar një ndeshje më të mirë se ndaj madrilenëve duke krijuar raste para portës kundërshtare, sidomos në pjesën e dytë.
Pasiguritë në prapavijë i kanë kushtuar shtrenjtë kuqezinjve ku trajneri Dede kishte bërë disa zëvendësime duke lënë jashtë nga formacioni titullar Lucajn, Beun, Gashin e Prengën në krahasim me ndeshjen me madrilenët.
Edhe pse krijoi shumë raste në fraksionin e dytë të lojës, goli i Shqipërisë erdhi shumë vonë me Muçin, i cili realizoi me kokë pas një goditje nga këndi.
Kuqezinjtë e mbyllin nesër pjesëmarrjen e tyre në këtë turne me sfidën kundër Olimpija Ljubljanës.